Frank Lampard er stjóri Chelsea í dag en hann tók við keflinu af Maurizio Sarri fyrr í sumar.

Lampard er markahæsti leikmaður í sögu Chelsea en hann var lengi hjá félaginu en fór svo stutt til Manchester City og Bandaríkjanna.

Það voru margir reiðir þegar Lampard ákvað að semja við City sem barðist um titilinn við Chelsea.

Einn stuðningsmaður fór svo langt og kallaði Lampard svikara með skilti sem hann mætti með á Stamford Bridge.

Lampard vonar innilega að sá maður sé búinn að fyrirgefa sér fyrir fyrsta heimaleikinn gegn Leicester City í dag.

,,Samband mitt við stuðningsmennina var sérstakt – fyrir utan einn mann sem mætti með skiltið,“ sagði Lampard.

,,Ég er stoltur að vera kominn aftur á Stamford Bridge og núna sem þjálfari.“