Það er útlit fyrir það að Spánverjinn Adrian muni verja mark Liverpool á morgun gegn Southampton.
Adrian meiddist á miðvikudaginn eftir leik við Chelsea í Ofurbikar Evrópu en hann var hetja liðsins í vítakeppni.
Stuðningsmaður rann og fór í ökkla Adrian í fagnaðarlátunum eftir leik og meiddist hann í kjölfarið.
Miðað við ummæli Adrian í kvöld þá er hins vegar útlit fyrir að hann verði klár.
,,Ég er mjög bjartsýnn á að ég geti byrjað að spila aftur á laugardaginn,“ sagði Adrian.
Andy Lonergan mun því líklega ekki spila sinn fyrsta leik fyrir Liverpool en hann kom til félagsins á frjálsri sölu á dögunum.