Óskar Örn Hauksson hefur átt frábært tímabil með KR í sumar en liðið situr á toppi deildarinnar þessa stundina.
Óskar hefur verið einn allra besti leikmaður KR í sumar þrátt fyrir að vera orðinn 34 ára gamall. Hann fagnar 35 ára afmæli sínu í ágúst.
Það eru margir sammála um það að Óskar sé einn allra besti leikmaður deildarinnar og hefur verið í þónokkur ár.
Venjan er að leikmenn fari að hægja á sér með aldrinum en það má ekki segja um Óskar sem er enn í fullu fjöri.
Hann ræddi við Morgunblaðið um spilamennsku sína í sumar og var spurður út í það hvort hann hefði breytt einhverju fyrir þetta tímabil.
„Ég er nú bara að gera nákvæmlega það sama og ég hef alltaf gert,“ sagði Óskar við Morgunblaðið.
,,Ég átti kannski ekki mitt besta tímabil í fyrra en ég er ekki að gera neitt nýtt. Jú, jú, maður er búinn að fá einhverja athygli í sumar og það er bara gaman, og jú, maður er kominn á einhvern aldur en ég er sjálfur minnst að pæla í því.“
„Ég hef æft eins og maður síðan ég var bara krakki. Ég hef alltaf hugsað vel um mig og fótboltinn hefur alltaf verið númer eitt hjá mér, og ég held að það sé bara að skila sér. Ég byrjaði ekki bara að hugsa vel um mig eftir þrítugt, eins og margir gera, heldur hef ég alltaf gert það.“