Laurent Koscielny, fyrirliði Arsenal, er særður þessa stundina en þetta segir fyrrum liðsfélagi hans Olivier Giroud.

Giroud og Koscielny þekkjast mjög vel en þeir voru saman í sex ár hjá Arsenal og voru einnig samherjar í franska landsliðinu.

Koscielny neitaði að mæta í æfingaferð Arsenal í sumar en leikmenn liðsins ferðuðust til Bandaríkjanna.

Koscielny vill að Arsenal leyfi sér að komast burt en hann á eitt ár eftir af samningi sínum í London.

,,Þú getur ekki dæmt stöðuna þegar þú veist ekki alla söguna. Ég er viss um að við vitum ekki allt á bakvið þetta,“ sagði Giroud.

,,Ég vona að það finnist lausn á þessu máli. Lolo er góður vinur minn og ég hef þekkt hann í 1ö eða 11 ár. Við spiluðum saman í næst efstu deild Frakklands.“

,,Hann hefur spilað fyrir Arsenal í níu ár og hefur verið fyrirliði í mörg ár. Hann er mikill atvinnumaður og er alltaf fyrirmynd fyrir yngri leikmenn.“

,,Ég vorkenni honum því hann er svo frábær manneskja og fjölmiðlar reyna að eyðileggja orðspor hans.“

,,Ég er ekki hjá félaginu og veit ekki hvað gerðist en eitt er víst – Lolo er mjög særður yfir því sem er í gangi, hann er tilfinningarík manneskja.“