Ágúst Gylfason, þjálfari Breiðabliks, viðurkennir að sínir menn hafi ekki boðið upp á nógu góða frammistöðu í kvöld.
Blikar heimsóttu KR í toppslag Pepsi Max-deildarinnar en þurftu að sætta sig við 2-0 tap á Meistaravöllum.
,,Mér fannst í rauninni leikurinn heilt yfir slakur hjá báðum liðum. Það sem liðin lögðu upp með var ekki að virka,“ sagði Ágúst við Stöð 2 Sport.
,,Það var ekki eins og tvö topplið væru að spila hérna en því miður vorum við slakari en þeir og þeir verðskulduðu sigurinn.“
,,Við töpum þessum leik og það er það sem situr eftir en hvernig leikurinn var, bara virðing beggja liða. Frammistaðan á að vera betri en það voru móment í þessum leik. Thomas Mikkelsen fær tvö dauðafæri sem ég hefði viljað sjá í netinu en við áttum ekkert skilið hérna.“
Hlynur Örn Hlöðversson gerði sig sekan um slæm mistök í seinna marki KR en hann kom inná í markið eftir meiðsli Gunnleifs Gunnleifssonar.
,,Hlynur átti klárlega að geta betur, við erum heiðarlegir með það en annars gerði hann vel. Þetta var leiðinlegt atvik, hann á að verja þetta en svona hlutir gerast.“