Gunnleifur Gunnleifsson varð á sunnudag leikjahæsti leikmaður í deildakeppni á Íslandi, Gunnleifur lék þá sinn 424 deildaleik á landinu, þegar Breiðablik vann FH.

Þessi magnaði markvörður fagnar 44 ára afmæli sínu í sumar en hann hefur sjaldan spilað betur.

„Það pirrar mig oft þegar fólk hefur aldur minn á heilanum og ég get alveg viðurkennt að það fer í taugarnar á mér að þurfa að svara á hverju hausti hvort að ég ætli að halda áfram. Ég hef hins vegar mjög gaman af því að fara í gegnum ferilinn og rifja upp þær fjölmörgu góðu minningar sem ég á úr boltanum,“ segir Gunnleifur við Fréttablaðið í dag.

Gunnleifur hefur breyst talsvert sem markvörður á þessum árum, en hvað hefur breyst?

„Ég hef þróast mjög sem markmaður og þrátt fyrir að ég geti enn sýnt góða fótavinnu og tekið vörslur þar sem ég þarf að skutla mér og sýna snögg viðbrögð þá er ég orðinn betri í að stýra leiknum þannig að ég hafi minna að gera. Ég er orðinn mun betri í að stýra varnarlínunni fyrir framan mig og haga hlutum þannig að ég þurfi sjaldndar að taka á honum stóra mínum.“

Myndband til heiðurs Gunnleifs frá BlikarTV er hér að neðan.