Eins og allir vita þá hefur gengið illa hjá liði Vals í sumar en íslandsmeistararnir sitja í neðsta sæti Pepsi Max-deildarinnar.
Valur tapaði 2-1 gegn Stjörnunni í sjöundu umferð í gær og bendir ekkert til þess að liðið ætli að rétta úr kútnum.
Það var rætt gengi Vals í hlaðvarpsþættinum Sóknin í dag en þar fóru Hörður Snævar Jónsson og Hrafn Norðdahl yfir málin.
Hrafn byrjar á því að nefna vörn Valsmanna sem míglekur þessa stundina. Vörnin er sú sama og í fyrra þrátt fyrir breytingar sóknarlega.
,,Við vissum að sóknarlínan var að fara út það kemur ný í staðinn svo það kemur endilega ekki á óvart að það væri erfitt að skora mörk,“ sagði Hrafn.
,,Það sem kemur mér mest á óvart er að vörnin míglekur. Eiður Aron er skugginn af sjálfum sér og Orri dettur út í gær, það er það sem mér finnst skrítið.“
,,Þeir eiga að vera búnir að spila sig saman þessir gæjar sem voru inná í gær en það er ekkert í gangi í vörninni.“
Hörður ræðir svo þjálfarann Ólaf Jóhannesson og telur að það séu hins vegar engar líkur á því að hann verði rekinn.
,,Það er lítill taktur í varnarleik Vals. Menn eru farnir að velta fyrir sér stöðu Ólafs Jóhannessonar en það er ljóst að hann verður aldrei rekinn frá Val.“
,,Hann hefur unnið fjóra titla á fjórum árum og á inni eina skitu ef svo má að orði komast. Ef það er eitthvað sem gerist er að Ólafur Jóhannesson segi upp störfum. Ég held að það sé eini möguleikinn, ef hann telur sig ekki ná til leikmanna eða geta breytt þessari vondu stöðu sem Valur er í þegar 1/3 af mótinu er búinn.“