Thiago Silva, leikmaður Paris Saint-Germain, mun leggja skóna á hilluna um leið og hann finnur fyrir því að líkaminn sé að gefa sig.

Silva greindi sjálfur frá þessu í gær en hann er 34 ára gamall í dag og verður 35 ára í september.

Silva hefur lengi verið einn öflugasti hafsent Evrópu en hann gekk í raðir PSG árið 2012 og á að baki 179 deildarleiki fyrir félagið.

,,Ég vona að ég geti tekið þessa ákvörðun áður en lappirnar gefa sig,“ sagði Silva.

,,Ég vil ekki verða mér til skammar á vellinum. Ég vil ekki finna fyrir því að ég sé ekki upp á mitt besta og að leikmenn geti auðveldlega ráðið við mig.“

,,Ég er ánægður með hversu sigursæll þessi ferill hefur verið og vil enda hann eins vel og ég get.“