Hamza Choudhury reyndist skúrkurinn í gær er enska U21 landsliðið tapaði gegn Frökkum á EM.

England er ekki í góðri stöðu eftir 2-1 tap í gær og þarf að vinna næstu tvo leiki sína til að eiga möguleika á að komast úr riðlinum.

Choudhury fékk beint rautt spjald í leiknum en England tapaði 2-1. Bæði mörk Frakka komu á lokamínútum leiksins.

,,Ég held að mér hafi aldrei liðið eins illa á knattspyrnuferlinum. Ég brást strákunum og þjóðinni,“ sagði Choudhury.

,,Ég man að ég gat unnið boltann þarna en þegar ég horfi til baka þá var ég full ákafur. Ég ætlaði ekki að særa hann, það var ekki planið.“

,,Ég sá boltann og reyndi að ná honum en tímasetningin var röng. Ég skil að það fylgi því ákveðin pressa að spila í þessum gæðaflokki.“