Jose Mourinho, fyrrum stjóri Chelsea og Manchester United, sá Liverpool vinna Barcelona 4-0 í Meistaradeildinni í gær.

Liverpool er komið í úrslitaleik keppninnar eftir magnaaðan 4-0 sigur á Anfield en liðið tapaði fyrri undanúrslitaleiknum 3-0.

Mourinho bjóst alls ekki við úrslitum gærkvöldsins og hrósaði þjálfara Liverpool, Jurgen Klopp þá sérstaklega eftir afrekið.

,,Ég bjóst ekki við þessu. Ég sagði þó að ekkert væri ómögulegt,“ sagði Mourinho við beIN Sports.

,,Ég sagði að ef þetta væri mögulegt þá væri Anfield einn af þeim stöðum þar sem þetta er mögulegt.“

,,Þetta snýst um eitt nafn: Jurgen. Þetta snýst ekki um leikstíl eða hugmyndafræði.“

,,Þetta tengist hjarta og sál og þessu andrúmslofti sem hann hefur búið til á meðal þessara leikmanna.“

,,Þeir hefðu getað klárað þetta magnaða tímabil án þess að geta fagnað einhverju og nú eru þeir einu skrefi frá því að verða meistarar Evrópu.“