Zinedine Zidane, stjóri Real Madrid, er strax byrjaður að upplifa erfiðleika hjá félaginu eftir að hafa snúið aftur nýlega.
Frá þessu greina spænskir miðlar en Zidane hætti síðasta sumar og tók svo aftur við keflinu á miðju tímabili.
Samkvæmt fréttum dagsins þá hefur Zidane rifist við forseta félagsins, Florentino Perez.
Ástæðan er sú að þeir eru ekki sammála um hvaða risakaup félagið ætti að gera í sumar.
Zidane vill fá miðjumanninn Paul Pogba frá Manchester United en hann gæti verið falur.
Perez er ekki sannfærður um að Pogba sé rétti maðurinn og kýs frekar að reyna við Christian Eriksen, leikmann Tottenham.
Það verður fróðlegt að sjá hvað gerist hjá Real í sumar en ljóst er að eitthvað þarf að breytast eftir hörmulegt gengi í vetur.