Paul Pogba, leikmaður Manchester United, þarf að stíga upp og ræða við stjórn félagsins.

Þetta segir Gary Neville, fyrrum leikmaður liðsins en Pogba er sterklega orðaður við brottför í sumar.

Neville segir að Pogba hafi verið ólíkur sjálfum sér undanfarið og að hann þurfi að taka ákvörðun varðandi framtíðina.

,,Hann er leiðtogi að mínu mati, ég held að þetta sé góður strákur,“ sagði Neville á Sky Sports.

,,Manchester United hefur ekki unnið titilinn í sjö ár, þeir eru úti á þekju. Það er það sem við erum að upplifa.“

,,Paul Pogba getur borið Manchester United áfram í gegnum þessa tíma og þú getur byggt lið í kringum hann, David de Gea og Marcus Rashford.“

,,Pogba verður hins vegar að vera skýr hvort hann vilji gera það, koma United aftur á toppinn því hann er með gæðin í það.“

,,Hann er eini leikmaðurinn í hópnum sem ég myndi segja vera í heimsklassa. Hann spilaði ekki vel gegn Barcelona eða í fyrri leiknum gegn PSG, það er eins eitthvað sé að trufla hann.“

,,Umboðsmaðurinn hans er alltaf að gefa hitt og þetta í skyn, Barcelona og Real Madrid eru þarna og þau eru til. Hann þarf að gefa félaginu svör.“