Hlaðvarpsþátturinn, 90 mínútur hefur hafið göngu sína en um er að ræða þátt sem Hörður Snævar Jónsson, ritstjóri 433.is stýrir.
Rætt verður um fótbolta við áhugaverða gesti í vetur, farið verður um víðan völl.
Gestur þáttarins að þessu sinni er Garðar Gunnlaugsson sem ólst upp á Akranesi, gríðarleg pressa var á honum frá unga aldri enda bræður hans hetjur á Akranesi, Arnar og Bjarki.
Garðar leit mikið upp til bræðra sinna á yngri árum og þegar hann hóf knattspyrnuferil sinn.
Hann fór mikið út til að hitta þá á sínum tíma er bræðurnir reyndi fyrir sér í atvinnumennsku hjá ýmsum félögum.
,,Það var geggjað. Þeir eru farnir út þarna snemma, þeir fara út þegar ég er tíu ára eitthvað svoleiðis,“ sagði Garðar.
,,Þá var umfjöllunin ekki eins mikil og núna og það var erfiðara að fylgjast með þeim en maður fylgdist með með þeim í gegnum heimasímann, gamla góða snúrusímann.“
,,Það var ekkert internet til að fylgjast með þeim. Þeir voru frekar duglegir að bjóða mér út þannig ég gæti hitt þá reglulega og farið á leiki með þeim. Ég æfði líka með félagsliðunum sem þeir voru í, ég æfði með Feyenoord og þessum liðum sem var mjög gaman.“
,,Ég var endalaust stoltur af þeim og þeir hafa verið mínar fyrirmyndir í lífinu, bæði í fótbolta og fyrir utan fótbolta. Allir vita hvernig manneskjur þeir eru.“
,,Þetta eru mjög góðar fyrirmyndir að hafa. Ég gleymi því ekki að þegar ég var yngri þá og að læra fyrir skólann og svona þá var ég alltaf með mynd af þeim á borðinu þegar ég var að læra. Maður leit það mikið upp til þeirra.“