Ander Herrera, leikmaður Manchester United, hefur látið nokkra liðsfélaga sína hjá félaginu heyra það.

Nokkrir leikmenn United gáfu það í skyn fyrr á árinu að slæmt gengi liðsins á tímabilinu hafi verið vegna vandræða undir stjórn Jose Mourinho.

Paul Pogba, Anthony Martial, Phil Jones og Alexis Sanchez tjáðu sig allir um Mourinho sem var rekinn í desember.

Herrera þolir ekki þegar leikmenn gera slíkt og talar ekkert nema vel um Portúgalann.

,,Þetta hefur verið erfitt ár því við byrjuðum ekki eins vel og við vildum,“ sagði Herrera.

,,Mér er illa við að bera stöðuna saman við eitthvað og ég hata þegar leikmenn tala illa um þjálfarann sem er farinn.“

,,Ég get bara þakkað Mourinho sem gerði mig að betri leikmanni. Ég spilaði mikið undir hans stjórn og var valinn besti leikmaður tímabilsins með hann á bekknum.“