Alfreð Finnbogason gat brosað í kvöld eftir sigur Íslands á Andorra í undankeppni EM.

Alfreð byrjaði leikinn hjá íslenska liðinu í kvöld og sá liðið vinna góðan 2-0 útisigur í fyrsta leik.

Þetta var gríðarlega mikilvægur sigur fyrir strákana en um var að ræða fyrsta leikinn í undankeppninni.

,,Það er nákvæmlega orðið, skyldusigur. Við gerðum þetta fagmannlega og það hjálpaði mikið að við höfum skorað í fyrri hálfleik,“ sagði Alfreð.

,,Þetta var enginn leikur sem fer í sögubækurnar hjá íslenskri knattspyrnu en gríðarlega mikilvægt að fá þrjú stig og vera búnir að koma hingað.“

,,Markmiðið fyrir leikinn var að slökkva í því [sigurlausu gengi] og fá aftur sigurbraginn. Það var virkilega gott að komast inn í klefa og geta fagnað sigri.“

,,Auðvitað er smá ótti um það að meiðast þegar mannskapurinn er staddur eins og hann er en þetta var ekki versta gervigras sem maður hefur komið á.“

,,Þetta minnti svolítið á Egilshöll í gamla daga, það voru nokkrar æfingar þar á fyrsta grasinu þar svo við erum vanir því. Það var gríðarlega erfitt að meta oft hvar boltinn myndi detta.“

,,Það var erfitt að láta boltann ganga eins fljótt og við vildum en í heildina var þetta eins leikmynd og við vorum að búast við.“

,,Leikurinn gegn Frakklandi verður snúinn. Þeir verða meira með boltann en við þekkjum að spila gegn þeim, það gekk mjög vel fyrir nokkrum mánuðum.“

,,Ég held að það hafi ekki farið eins mikil orka í leikinn í dag svo við verðum að vera ferskir fyrir leikinn á mánudaginn.“