Manchester United er úr leik í enska bikarnum eftir leik við Wolves á útivelli um helgina. Lið United tapaði þar öðrum leiknum í röð undir stjórn Ole Gunnar Solskjær.
Um var að ræða leik í 8-liða úrslitum keppninnar en Wolves hafði betur með tveimur mörkum gegn einu.
Solskjær var óhress eftir leik enda var þetta besti möguleiki hans á að vinna titil á þessu tímabili, nú er aðeins Meistaradeildin sem er í boði. Þar mætir liðið Barcelona í átta liða úrslitum, verkefnið er því erfitt.
Zlatan Ibrahimovic, fyrrum framherji félagsins er á því að United verði að sleppa takinu af Sir Alex Ferguson, hann hafi of mikil áhrif á allt í dag.
,,Allt sem gerist í dag er borið saman við tíma Ferguson,“ sagði Zlatan en United hefur ekki náð flugi eftir að Ferguson hætti árið 2013.
,,Þeir tala um ef Ferguson væri hérna, þá hefði þetta ekki gerst. Ferguson myndi ekki gera hlutina svona. Það snýst allt um Ferguson.“
,,Ef ég réði, þá væri ekki talað um Ferguson meira. Ég myndi tala um að skapa mína eigin sögu.“
