Hlaðvarpsþátturinn, 90 mínútur hefur hafið göngu sína en um er að ræða þátt sem Hörður Snævar Jónsson, ritstjóri 433.is stýrir.
Rætt verður um fótbolta við áhugaverða gesti í vetur, farið verður um víðan völl.
Gestur þáttarins að þessu sinni er Erik Hamren sem hefur upplifað erfiða tíma í starfi sem landsliðsþjálfari karla, hann ræðir hér hörmungarnar sem hann gekk í gegnum í upphafi og framhaldið.
Undankeppni EM hefst á næsta föstudag þegar Ísland mætir Andorra og Frakklandi þremur dögum síðar.
Við spurðum Hamren út í framherjann Kolbein Sigþórsson sem er án félags þessa stundina.
Hamren valdi Kolbein ekki í nýjasta landsliðshópinn en hann hefur ekkert spilað á þessu tímabili.
Kolbeinn leitar sér nú að nýju félagi en hann hefur samið um starfslok við Nantes í Frakklandi.
,,Við erum í sambandi við Kolbein. Við sjáum hvað gerist, ég veit ekki hvað gerist,“ sagði Hamren.
,,Ég óskaði þess í haust, þegar hann var í hópnum var að hann yrði tilbúinn fyrir þessa leiki. Að hann væri að spila og svo gætum við nýtt okkur hans gæði og kraft.“
,,Það gekk ekki upp svo við þurfum að sjá hvað gerist. Hann er ekki tilbúinn en vonandi verður hann klár í júní.“
,,Hann þarf að fá að spila, hann veit það og við vitum það. Það verður spennandi að sjá hvað gerist næst.“
,,Það var aldrei möguleiki á að fá hann í þennan hóp. Ég ræddi við hann um þetta í janúar. Hann hefur ekki spilað í langan tíma.“