Kolbeinn Sigþórsson er ekki í landsliðshópnum sem er á leið í verkefni í undankeppni EM. Liðið mætir Andorra og Frakklandi á næstu dögum.
Kolbeinn er án félags en hann rifti samningi sínum við Nantes í síðustu viku. Hann hefur ekkert spilað síðan gegn Katar í æfingaleik fyrir jól.
Kolbeinn kom ekki til greina í þetta verkefni hjá Erik Hamren og hann útskýrði mál sitt.
,,Við erum í sambandi við hann, hann er ekki klár í þetta verkefni,“ sagði Hamren um að velja ekki Kolbein að þessu sinni.
,,Von mín í haust var að hann myndi vera klár núna, við vitum um hæfileika hans. Það er ekki þannig, ég vona að hann verði klár í sumar.“
Kolbeinn er orðaður við AZ Alkmaar og fleiri lið þessa dagana.
,,Við sjáum hvað gerist með hans mál, ég veit ekki hvað gerist. Ég er jákvæður að eitthvað gott komi úr þessu.“