Það bendir margt til þess að Bjarni Ólafur Eiríksson muni spila með Val í sumar. Hann hefur hafið æfingar með liðinu á nýjan leik.

Sigurbjörn Hreiðarsson, aðstoðarþjálfari Vals staðfesti þetta í samtali við 433.is. Sigurbjörn verður gestur í 90 mínútum, hlaðvarpsþætti okkar sem fer í loftið á morgun.

Bjarni hefur verið að íhuga að hætta í fótbolta en nú stefnir allt í að hann verði með Val í sumar, Bjarni hefur mætt á æfingar síðustu daga en hann hafði ekkert æft með liðinu frá síðasta hausti.

Bjarni hefur verið einn besti leikmaður Pepsi deildarinnar frá því að hann snéri heim úr atvinnumensku árið 2013.

Hann hefur hjálpað Val að vinna tvo bikarmeistaratitla og tvo Íslandsmeistaratitla á þeim árum. Bjarni verður 37 ára á þessu ári.

Bjarni lék 21 A-landsleik fyrir Ísland á ferli sínum en hann lék mest í tíð Ólafs Jóhannessonar sem nú er þjálfari Vals.