Breiðablik hefur staðfest það að Davíð Kristján Ólafsson sé genginn í raðir Álasunds í Noregi. 433.is greindi fyrst allra frá þessu í morgun.

Davíð hefur verið einn öflugasti bakvörður Pepsi deildarinnar síðustu ár. Hann fór á reynslu til Álasunds fyrr í vetur og heillaði forráðamenn félagsins.

Álasund leikur í næst efstu deild Noregs en liðið var mjög nálægt því að fara upp á síðustu leiktíð. Með félaginu leika Hólmbert Aron Friðjónsson, Aron Elís Þrándarson og Daníel Leó Grétarsson.

Davíð er fæddur árið 1995 en hann hefur spilað 100 leiki í deild og bikar á Íslandi. Hann hefur alla tíð spilað fyrir Breiðablik.

Davíð lék sinn fyrsta A-landsleik í upphafi árs en hann hefur spilað fyrir yngri landslið Íslands.

Á sínum yngri árum var Davíð liðtækur í fimleikum en ákvað í seinni tíð að snúa sér að fullu að fótboltanum, það hefur reynst gæfuspor.

Blikar hafa misst marga sterka leikmenn í vetur en í vikunni var greint frá því að Willum Þór Willumsson væri að ganga í raðir BATE í Hvíta-Rússlandi. Þá var Gísli Eyjólfsson lánaður til Mjallby í Svíþjóð.