Geir Þorsteinsson og Guðni Bergsson eru á leið í baráttu, báðir sækjast eftir því að verða formaður KSÍ, þegar kosið verður á ársþingi sambandsins í byrjun febrúar.
Guðni er sitjandi formaður en Geir lét af störfum fyrir tveimur árum, hann hafði starfað sem formaður sambandsins í tíu ár.
Geir kynnti um framboð sitt á laugardag í kjölfarið af því sendum við könnun á formenn og framkvæmdarstjóra liða í efstu tveimur deildunum á Íslandi.
50 aðilar fengu tækifæri til að taka þátt í könnunni en 28 aðilar svöruðu póstinum sem var sendur út síðdegis á laugardag og höfðu aðilar til hádegis í dag, til að svara. Svarhlutfall var því 56 prósent.
Boðið var upp á þrjá möguleika, hvort menn ætluðu að kjósa Guðna, Geir eða hvort aðilar væru óákveðnir.
32,1 prósent af þeim sem svöruðu segjast ætla að kjósa Guðna á meðan 28,6 prósent segjast ætla að kjósa Geir.
Það eru hins vegar flestir sem segjast vera óákveðnir eða 39,3 prósent segjast ekki hafa gert upp hug sinn. Það er því ljóst að baráttan um atkvæði verður hörð, margir eiga eftir að gera upp hug sinn af þeim sem tóku þátt í þessari könnun.