Luke Shaw, leikmaður Manchester United, er veiki hlekkurinn í liðinu að mati Paul Parker sem lék eitt sinn með félaginu.
Shaw er 24 ára gamall í dag og telur Parker að hann hafi lítið upp á að bjóða framar á vellinum.
,,Ég vorkenndi Shaw undir stjórn Jose Mourinho. Hann átti þessa framkomu ekki skilið,“ sagði Parker.
,,Mourinho hefði átt að hjálpa honum og þá sérstaklega eftir þetta skelfilega fótbrot.“
,,Ég held þó að Shaw hafi ekki hjálpað sjálfum sér. Hann hefði átt að vera á besta matarplaninu og æfingaplaninu til að sanna sig en hann var það ekki.“
,,Hann hefur bara ekki komist í gang eins og ég vonaðist eftir. Hann er ekki nógu fjölbreyttur fram á við.“
,,Ekkert sem hann gerir er öðruvísi. Hann kemst ekki framhjá neinum og gerir engin brögð með boltann.“
,,Ég skil það sem Mourinho sagði eftir leikinn gegn Chelsea að Harry Maguire yrði í vandræðum með að fylla skarð Shaw sem hverfur stundum.“