Það kom aldrei til greina fyrir varnarmanninn Matthijs de Ligt að ganga í raðir Paris Saint-Germain í Frakklandi.
De Ligt greindi frá þessu í gær en hann hefur nú gert langtímasamning við ítalska stórliðið Juventus.
PSG var talið hafa áhuga á Hollendingnum í sumar og sögðu sumir að hann væri að biðja um himinhá laun í Frakklandi.
De Ligt hlær að þeim sögusögnum að hann hafi viljað fá betur borgað en undrabarnið Kylian Mbappe.
,,Ég reyndi að loka á þetta eins mikið og ég gat en það fylgir þessu alltaf eitthvað,“ sagði De Ligt.
,,Á einum tímapunkti þá var þetta orðið mjög þreytt. Það klikkaðasta sem ég las var að ég vildi ekki fara til PSG því ég vildi þéna meira en Kylian Mbappe. Þvílíka bullið.“