Stuðningsmenn Newcastle United eru reiðir eftir að félagið ákvað að ráða Steve Bruce til starfa í gær.

Bruce yfirgefur Sheffield Wednesday í næst efstu deild og er mættur aftur í ensku úrvalsdeildina.

Andy Robertson, bakvörður Liverpool, reynir að róa stuðningsmenn Newcastle og segir að Bruce sé góður kostur.

Bruce fékk Robertson til Hull City árið 2014 en hann hafði áður leikið með Dundee United í Skotlandi.

,,Það er mikil neikvæðni í kringum þetta en það er ósanngjarnt í garð manns sem hefur afrekað það sama og hann,“ sagði Robertson.

,,Ég vona að hann fái þann stuðning sem hann á skilið. Hann var stór ástæða fyrir því að ég samdi við Hull.“

,,Áður en ég ræddi við Steve þá vildi ég ekki fara til Hull, umboðsmaður minn getur sagt ykkur frá því.“