Samuel Chukwueze er nafn sem einhverjir ættu að kannast við en hann leikur með liði Villarreal á Spáni.
Chukwueze er talinn mikið efni en hann er 19 ára gamall og hefur spilað þónokkra leiki fyrir aðalliðið.
Vængmaðurinn spilaði sinn fyrsta landsleik fyrir Nígeríu á síðasta ári en hann hafði það ansi erfitt á yngri árum.
Chukwueze er uppalinn í Umuahia í Nígeríu og lék þar í landi áður en Villarreal samdi við hann árið 2017.
Foreldrar Chukwueze reyndu ítrekað að koma í veg fyrir hans knattspyrnuiðkun og vildu sjá hann einbeita sér að náminu.
Chukwueze hafði alltaf brennandi áhuga á knattspyrnu og nýtti sér öll tækifæri til að spila.
Foreldar hans reyndu þó að banna honum að mæta á æfingar en það skilaði ekki árangri. Hann hlustaði ekki.
Þau tóku svo upp á því að kveikja í knattspyrnuskóm sonar síns en þrátt fyrir það gafst hann aldrei upp.
Chukwueze hélt áfram að bæta sig og spila og upplifir nú drauminn á Spáni. Stórlið á borð við Atletico Madrid og Bayern Munchen eru sögð hafa áhuga á stráknum.