John Aldridge, goðsögn Liverpool, væri til í að sjá félagið leita til Tottenham í sumarglugganum.

Liverpool mun líklega styrkja sóknarlínuna í sumar og þá helst fá inn mann sem getur aukið breiddina í hópnum.

Antoine Griezmann er nefndur til sögunnar en Aldridge telur sig vita um betri möguleika fyrir þá rauðu.

,,Það er búið að nefna Griezmann sem mögulegt skotmark en hann yrði rándýr möguleiki. Hann myndi vilja risalaun og það er leikmaður sem vill byrja alla leiki,“ sagði Aldridge.

,,Ég velti því fyrir mér hvort það sé hægt að lokka Lucas Moura frá Tottenham því hann er pirraður eftir að hafa verið á bekknum í úrslitum Meistaradeildarinnar þrátt fyrir þrennu í undanúrslitunum.“

,,Hann er leikinn sóknarmaður sem gæti komið inn ef hinir þrír eru meiddur og það sama má segja um liðsfélaga hans Son Heung-Min.“

,,Það kæmi mér þó verulega á óvart ef Tottenham leyfir honum að fara eftir frábært tímabil.“