Frank Lampard ætti ekki að samþykkja að tala við Chelsea í sumar ef liðið býður honum starfið.
Þetta segir Dennis Wise, fyrrum samherji Lampard en sá síðarnefndi gerði fína hluti með Derby í vetur.
Það er fyrsta þjálfarastarf Lampard en hann er goðsögn á Stamford Bridge eftir farsælan feril þar.
,,Þetta kemur mér á óvart, ef ég er hreinskilinn. Hann gerði vel með Derby með að komast í umspilið en að komast ekki upp er ekki nógu gott. Það yrði gott fyrir hann að vera áfram,“ sagði Wise.
,,Chelsea býst við að komast í Meistaradeildina og vinna stærstu bikarana. Það er risastórt skref.“
,,Það væri mikil áhætta en þannig er Frank. Hann mun taka þessa áhættu. Hann vill reyna á þetta. Ég held að það sé ekki rétt, hann ætti að vera þolinmóður.“