Rúnar Kristinsson, þjálfari KR, var gríðarlega sáttur með sína menn í kvöld eftir 3-1 sigur á Skagamönnum.

KR vann virkilega sannfærandi 3-1 sigur á Akranesi og er nú komið í efsta sæti deildarinnar.

,,Ég er gríðarlega ánægður. Við vorum góðir í dag og við þurftum þess til að vinna spræka og góða Skagamenn,“ sagði Rúnar við Stöð 2 Sport.

,,Við spiluðum við þá í úrslitum Lengjubikarsins og við fylgjumst með þeim eins og öðrum liðum. Ég held að ég sé engin undantekning í því að við reynum að lesa í andstæðingana og finna lausnir. Þær eru ólíkar en okkar heppnuðust vel í dag og ég er ánægður með það.“

,,Það er gott að vinna á Skaganum, stóru liðin hafa öll runnið hér á svellinu en Skagamenn eru hörkugóðir og hafa átt skilið þá punkta sem þeir hafa fengið í sumar.“

,,Þó að liðið heiti FH, Valur eða Breiðablik þá þarf alltaf að spila þessa leiki. Við höfum séð þau koma hingað og átt erfitt uppdráttar. Við lærum af mistökum annarra og nýtum okkar þætti sem við erum góðir í.“