Það var algjör martröð fyrir markvörðinn Vito Mannone að æfa með liði Arsenal á sínum tíma.
Mannone var ungur markvörður Arsenal tímabilið 2007-2008 er Jens Lehmann og Manuel Almunia voru hjá félaginu.
Þeir tveir voru svo sannarlega ekki á sömu blaðsíðu og segir Mannone að það hafi verið erfitt að vinna með þeim á æfingasvæðinu.
,,Þetta var erfitt því Jens var mjög ákafur markvörður og hann var það sérstaklega þegar kom að Almunia,“ sagði Mannone.
,,Þið getið ímyndað ykkur hvernig þetta var fyrir mig og spennuna á æfingasvæðinu.“
,,Þetta var mjög erfitt því þú reynir að læra og gera þitt en á sama tíma voru þeir að reyna að drepa hvorn annan.“
,,Þegar þú æfir fyrirgjafir, skot og tæklingar þá þarftu að hjálpa liðsfélögunum. Það var ekki mikil hjálp þarna.“