Julian Draxler er ekki maðurinn sem Tottenham mun fá ef Christian Eriksen yfirgefur liðið í sumar.
Draxler er orðaður við Tottenham þessa stundina en félagið leitar að mögulegum arftaka Eriksen sem gæti verið á förum.
Þýski landsliðsmaðurinn tekur það þó ekki að sér en hann hefur engan áhuga á að yfirgefa PSG í Frakklandi.
,,Ég hef ekki heyrt neitt frá félaginu. Ég hef ekki talað við neinn og veit ekki neitt,“ sagði Draxler.
,,Ég get ekki sagt neitt um þessar sögusagnir því ég hef engan áhuga á að yfirgefa félagið.“