Andri Rafn Yeoman, leikmaður Breiðabliks, átti góðan leik í kvöld er liðið vann 4-1 sigur á FH.

Andri skoraði fyrsta mark Breiðabliks í leiknum en öll mörk liðsins komu í seinni hálfleik.

,,Auðvitað er þetta aldrei fullkominn hálfleikur en þetta var kraftmikið og við náðum algjöru controli á leiknum,“ sagði Andri.

,,Við náðum að halda þeim aftar á vellinum, þeir vilja spila og við þvinguðum þá til að spila þar sem við vildum að þeir væru á vellinum og unnum boltann af þeim og refsuðum.“

,,Við nýttum tækifærin í staðinn fyrir að komast 1-0 yfir að verja eitthvað þá fylgdum við því vel eftir og nýttum momentið sem var með okkur þá og héldum þeim aftarlega.“

,,Það hefur verið spilað með nokkra daga millibili þannig maður vissi það að ef við kæmumst yfir þá væri þetta í okkar höndum.“

Andri er nú byrjaður að skora nokkur mörk fyrir Breiðablik og hefur hann gaman að því að komast á blað, eitthvað sem hann er kannski ekki þekktur fyrir.

,,Kannski þurfti bara að setja mig framar á völlinn. Auðvitað er þetta gaman, þetta er bara auka en maður á örugglega að eiga einhver mörk inni!“

,,Nú er komið að umferðunum þar sem fer að skilja á milli liða svo þessir tveir síðustu sigrar voru mikilvægir, að ná að ýta þeim aðeins frá okkur.“