Robin van Persie, fyrrum leikmaður Manchester United, segir að það væri rugl að reka Ole Gunnar Solskjær frá félaginu þrátt fyrir erfitt gengi síðustu vikur.

United byrjaði mjög vel undir stjórn Solskjær í desember en gengi liðsins versnaði undir lok tímabils.

Norðmaðurinn fékk þriggja ára samning á Old Trafford og segir Van Persie að félagið þurfi að virða þá ákvörðun.

,,Ég tel að þetta sé fullkomið samstarf, þeir eru bara að ganga í gegnum erfiða tíma,“ sagði Van Persie.

,,Í gamla daga þá var eðlilegt fyrir stjóra að fá tíma. Í dag, ef þú tapar sex leikjum þá ertu rekinn, er það einhver lausn?“

,,Gefðu einhverjum tíma, sérstaklega ef þetta er strákur sem er frá félaginu. Þetta er fyndið því í byrjun þá voru allir svo jákvæðir, þeir voru að vinna leiki og framkvæmdu svo kraftaverk í París.“

,,Það voru allir að öskra á félagið að gefa honum endanlegan samning. Síðan þá hefur heppnin horfið aðeins; þeir hafa tapað fleiri leikjum en þeir vildu.“

,,Hann fékk þriggja ára samning og allir ættu að horfa á heildarmyndina. Hann er jákvæður og vill afreka stóra hluti með félaginu og það er eina leiðin fram á við.“