KR vann sigur í Pepsi Max-deild karla í kvöld er liðið fékk nýliða HK í heimsókn á KR-völlinn.
KR komst í 3-0 á heimavelli í kvöld en HK neitaði að gefast upp og náði að minnka muninn í 3-2 undir lok leiksins en það dugði þó ekki fyrir stigi.
Hér má sjá það góða og slæma úr leiknum.
Plús:
KR spilaði gríðarlega vel á köflum í leiknum í kvöld og virtust lengi ætla að vinna sannfærandi sigur.
Spilamennska KR var gríðarlega góð í kvöld og þá sérstaklega í fyrri hálfleik. Við endurtökum, fyrri hálfleik.
Óskar Örn Hauksson er handleggsbrotinn en hann spilaði í kvöld. Var alveg frábær á vængnaum í leiknum. Hann er þeim svo ótrúlega mikilvægur.
Það gerir KR ekkert nema gott að þeir Björgvin Stefánsson og Tobias Thomsen hafi báðir komist á blað. Framherjapar sem þarf að skila mörkum.
HK svaraði frábærlega fyrir sig undir lok leiksins. Tvö mörk á tveimur mínútum og ljóst að lið fólksins gefst ekki upp auðveldlega. Þeir ætla ekki bara að vera með í sumar.
Mínus:
Brynjar Jónasson gat komið HK fyrr inn í leikinn í kvöld en klikkaði á vítaspyrnu á 65. mínútu leiksins, það hefði getað breytt miklu.
Varnarmenn HK litu alls ekki vel út í þriðja marki KR. Björgvin tók þá langan sprett með boltann og reyndist einfaldlega alltof sterkur og réðu þeir ekki við hann.
KR-ingar fá svo mikinn mínus fyrir að hleypa HK aftur inn í leikinn undir lokin. Algjör óþarfi, þeir voru alveg með þetta.
Brynjar fékk DAUÐAFÆRI til að jafna metin fyrir HK í uppbótartíma og sluppu KR-ingar ansi vel að lokum.