Patrice Evra, fyrrum leikmaður Manchester United, setur stórt spurningamerki við félagaskipti Alexis Sanchez sem kom til félagsins í fyrra.
Sanchez kom til United frá Arsenal en hann hefur síðan þá aðeins gert fimm mörk í 45 deildarleikjum.
Það hefur ekkert gengið hjá sóknarmanninnum á Old Trafford og skilur Evra í raun ekki af hverju hann samdi við félagið.
,,Sumir leikmenn elta bara peningana, ég óttast ekki að segja það,“ sagði Evra við Sky Sports.
,,Ég hef ekkert á móti honum en þegar ég sá félagaskiptin ganga í gegn þá taldi ég sögu United vera á niðurleið.“
,,Hann gat gengið í raðir Manchester City en þeir buðu minni laun og betri fótbolta – fyrirgefiði en City spilar betri fótbolta. Pep Guardiola hefði líka bætt hann.“
,,Ég vil fá að vita raunverulegu ástæðuna fyrir því að hann valdi United? Ekki segja mér að hann hafi elskað liðið síðan hann var krakki.“
,,Þetta snerist annað hvort um peningana eða hann vildi vera númer eitt, taka treyju númer sjö og vera stjarnan.“