Helgi Sigurðsson, þjálfari Fylkis, var nokkuð ánægður með stigið sem sínir menn fengu gegn KR í kvöld.
Staðan var 1-0 fyrir KR þar til í blálokin en Valdimar Þór Ingimundarson jafnaði þá metin fyrir gestina eftir hornspyrnu.
,,Þetta var gott stig en miðað við seinni hálfleikinn vorum við ofan á og fengum 2-3 færi rétt fyrir markið,“ sagði Helgi við Stöð 2 Sport.
,,Þetta lá í loftinu en ég skil gremju KR-inga, við fengum að finna fyrir þessu í síðasta leik.“
,,KR var klárlega betra liðið í fyrri hálfleik en við komum út í þeim seinni og settum pressu á þá og fórum hærra með liðið.“
,,Við breyttum í þriggja manna vörn og pressuðum sem gekk vel. Aðstæðurnar voru erfiðar en ég er fyrst og fremst ánægður með karakterinn.“
,,Ég sagði við strákana fyrir mót að þetta snerist ekki alltaf um fagurfræðina í byrjun, þetta snýst um að fá aukið sjálfstraust og við höfum sýnt það í allan vetur að við gefumst ekki upp.“