Alastair Campbell, fyrrum talsmaður Tony Blair, forsetisráðherra Bretlands, er mikill stuðningsmaður Burnley.

Campbell hefur aldrei farið leynt með ást sína á Burnley og er gríðarlegur aðdáandi stjóra liðsins, Sean Dyche.

Campbell telur að Dyche sé besti þjálfari úrvalsdeildarinnar í dag og telur að enginn hefði getað afrekað það sama hjá félaginu.

Burnley hefur verið í fallbaráttu á þessu tímabili en er í ansi góðri stöðu eftir jafntefli við Chelsea á mánudag.

,,Ekki vanmeta þessa ótrúlegu sigurgöngu sem félagið hefur verið á undanfarið ár,“ sagði Campbell.

,,Ég er ekki sannfærður um að Pep Guardiola, Arsene Wenger, Jose Mourinho eða Jurgen Klopp hefðu gert eins vel hjá Burnley og Dyche hefur gert.“

,,Ég held að hann hafi náð betri árangri með Burnley en nokkur annar þjálfari hefði náð.“

,,Sean Dyche gæti unnið úrvalsdeildina eða Meistaradeildina með City eða Liverpool. Þeir gætu hins vegar ekki gert það sem hann gerði hjá Burnley.“