Það muna margir eftir frægu atviki sem gerðist árið 2014 í leik Liverpool og Chelsea í ensku úrvalsdeildinni.

Steven Gerrard, fyrirliði Liverpool, rann þá á ögurstundu í leik liðanna sem varð til þess að Demba Ba skoraði sigurmark Chelsea í mikilvægum leik í titilbaráttunni.

Ba ræddi atvikið við blaðamenn í dag en hann vorkennir Gerrard ekki sem missti af gullnu tækifæri til að vinna úrvalsdeildina í fyrsta sinn á ferlinum.

,,Ég vorkenni honum ekki. Ég er ekki stuðningsmaður Gerrard og ekki stuðningsmaður Liverpool,“ sagði Ba.

,,Ég er ekki stuðningsmaður Manchester City og var ekki glaður þegar þeir unnu deildina.“

,,Þetta er allt hluti af leiknum. Það er eins með Crystal Palace sem vann gegn Stoke í lokaumferð síðustu leiktíðar og sendi þá niður. Þú vinnur þína vinnu.“

,,Ég myndi segja að Jose Mourinho hafi stillt upp varaliðinu. Margir leikmenn þarna voru ekki í byrjunarliðinu í hverri viku.“

,,Við stilltum svona upp og hann bjóst samt við að við myndum vinna. Hann var mjög ákveðinn fyrir leikinn, hann var hávær í búningsklefanum.“