Thibaut Courtois, markvörður belgíska landsliðsins, gerði slæm mistök í 3-1 sigri á Rússlandi í undankeppni EM í gær.
Courtois missti boltann í eigin vítateig í marki Rússa en hann hefur verið mikið gagnrýndur með Real Madrid á leiktíðinni.
Hann segir að mistökin þýði ekki neitt og segist vera einn besti markmaður heims þrátt fyrir gagnrýni spænskra miðla.
,,Ég tel mig ennþá vera einn þann besta þrátt fyrir að spænska pressan vilji drepa mig,“ sagði Courtois.
,,Mér finnst ég vera mjög sterkur. Ég er rólegur því ég er að æfa vel og ég spila vel.“
,,Þetta voru lítil mistök en svona er líf markvarðarins. Þrátt fyrir það var ég rólegur og spilaði minn leik.“