Cristiano Ronaldo, leikmaður Juventus, er alls ekki sjálfselsk manneskja segir fyrrum samherji hans hjá Manchester United, Fabio da Silva.

Fabio kom til United ásamt bróður sínum Rafael árið 2008 er Ronaldo var skærasta stjarna Rauðu Djöflanna.

Hann segir að Ronaldo hafi hjálpað sér mikið á Old Trafford en Fabio leikur í dag fyrir Nantes í Frakklandi.

,,Sumir leikmenn voru ótrúlega vinalegir við okkur, eins og Darren Fletcher,“ sagði Fabio við ESPN.

,,Hann hjálpaði okkur mikið og við erum enn vinir. Rio Ferdinand og Cristiano, sem talaði portúgölsku, hjálpuðu okkur mikið. Við kunnum ekki eitt orð í ensku.“

,,Ég heyrði það að Cristiano væri sjálfselskur en hann hætti ekki að gefa okkur ráð bæði innan sem utan vallar.“

,,Ég spilaði minn fyrsta leik gegn Tottenham og var við hlið hans. Cristiano sagði mér að taka engar áhættur á okkar vallarhelmingi því að hann gæti kannski ekki komið til baka og hjálpað.“

,,Hann sagði að ég gæti gert hvað sem er á þeirra vallarhelmingi. Mér leið svo vel eftir stuðning Cristiano.“