Cristiano Ronaldo, leikmaður Juventus, gæti átt von á refsingu frá UEFA eftir hegðun sína í gær.

Ronaldo skoraði þrennu í 3-0 sigri Juventus á Atletico Madrid og kemur það liðinu í 8-liða úrslit Meistaradeildarinnar.

Eftir leikinn var Portúgalinn gríðarlega ánægður og gerði grín að Diego Simeone, stjóra Atletico.

Simeone fagnaði vel eftir fyrri leik liðanna í Madríd en hann greip í klofið á sér og ögraði þannig stuðningsmönnum og leikmönnum gestaliðsins.

Simeone fékk væna sekt frá UEFA eftir þessa hegðun og gæti Ronaldo nú fengið svipaða refsingu.

Simeone sagði eftir leikinn að hann hafi verið að sýna stuðningsmönnum að hans leikmenn væru með eistun í að klára svona verkefni.