Sergio Ramos, leikmaður Real Madrid, hefur verið ákærður af UEFA eftir leik gegn Ajax í Meistaradeildinni.
Ramos fékk gult spjald á 89. mínútu leiksins í 2-1 sigri Real á Ajax en leikurinn fór fram í Hollandi.
Um var að ræða fyrri leik liðanna af tveimur í 16-liða úrslitum og missir Ramos nú af seinni leiknum.
Ramos er ákærður fyrir að hafa nælt sér í viljandi gult spjald svo hann yrði í banni í þeim leik frekar en í 8-liða úrslitum ef Real kemst áfram.
,,Ég væri að ljúga ef ég myndi segja að ég hefði ekki reynt að fá þetta spjald,“ var haft eftir Ramos eftir leikinn.
Varnarmaðurinn neitaði þó fyrir það degi seinna og segir að ummælin hafi verið tekin úr samhengi.