Didier Drogba, fyrrum leikmaður Chelsea, var í dag beðinn um að velja besta lið í sögu ensku úrvalsdeildarinnar.

Drogba var beðinn um að velja sitt fimm manna draumalið og er hópurinn ansi sterkur.

Drogba lék með fjölmörgum góðum hjá Chelsea á sínum tíma og eru þrír í hans liði fyrrum samherjar.

Thierry Henry, fyrrum leikmaður Arsenal, fær einnig pláss hjá Drogba en hann er talinn einn besti sóknarmaður í sögu úrvalsdeildarinnar.

,,Thierry Henry, Frank Lampard, Petr Cech og Peter Crouch, hann þarf ekki að hoppa heldur er bara þarna. Svo líka Eden Hazard,“ sagði Drogba.

Það er mjög athyglisvert að Crouch fái kallið frá Drogba en hann hefur alls ekki átt eins farsælan feril og hinir fjórir.

Crouch er þó mjög hávaxinn og gæti komið sér vel að hafa einn turn í fremstu víglínu!

Fjölmargir knattspyrnumenn hafa valið sitt fimm manna draumalið en Crouch hefur aldrei fengið kallið áður.