Leeds United á Englandi hefur verið sektað um 200 þúsund pund af enska knattspyrnusambandinu.

Þetta var staðfest í dag en félaginu var refsað fyrir atvik sem kom upp fyrir leik gegn Derby County.

Marcelo Bielsa, stjóri Leeds, sendi þá njósnara á æfingasvæði Derby fyrir leik liðanna í næst efstu deild.

Bielsa hefur allan sinn feril notað þessa aðferð til að kynnast andstæðingum sínum betur.

Það er þó ekki tekið vel í það á Englandi og hefur knattspyrnusambandið refsað félaginu ansi harkalega.

Einnig var tekið fram í tilkynningu sambandsins að Leeds mætti alls ekki gera slíkt hið sama aftur.