Manchester United þénaði 206,6 milljónir punda á síðasta fjórðungi síðasta árs. Frá þessu var greint í gær.
Félagið hefur aldrei þénað meira á þessum ársfjórðungi en tekjur af auglýsingum og miðsölu jókst á milli ára. Félagið býst við því að þéna 615-630 milljónir punda á þessu tímabili en það reyndist dýrt að reka Jose Mourinho.
Mourinho var rekinn í desember og í skýrslu United kemur fram að það hafi kostað 19,6 milljónir punda að reka Mourinho og teymi hans.
Mourinho sjálfur fékk 15 milljónir punda fyrir það eitt að vera rekinn en samtals greiddi United honum 43,2 milljónir punda. Fyrir að skrifa undir, í laun og fyrir það eitt að vera rekinn.
Louis van Gaal kostaði United 23,7 milljónir punda en David Moyes kostaði United 8,7 milljónir punda.
Þessir þrír stjórar hafa kostað United 75,6 milljónir punda en þeir stýrðu United eftir að Sir Alex Ferguson hætti.
Nú er Ole Gunnar Solskjær stjóri liðsins, tímabundið en hann gæti fengið starfið til framtíðar.