Álasund hefur staðfest kaup sín á Davíð Kristján Ólafssyni frá Breiðabliki. 433.is greindi fyrst allra frá þessu í morgun að Davíð væri að fara til Noregs.
Davíð hefur verið einn öflugasti bakvörður Pepsi deildarinnar síðustu ár. Hann fór á reynslu til Álasunds fyrr í vetur og heillaði forráðamenn félagsins.
Álasund leikur í næst efstu deild Noregs en liðið var mjög nálægt því að fara upp á síðustu leiktíð. Með félaginu leika Hólmbert Aron Friðjónsson, Aron Elís Þrándarson og Daníel Leó Grétarsson.
Davíð er fæddur árið 1995 en hann hefur spilað 100 leiki í deild og bikar á Íslandi. Hann hefur alla tíð spilað fyrir Breiðablik.
,,Ég er mjög ánægður með að skrifa undir hérna,“ sagði Davíð Kristján eftir að hafa skrifað undir þriggja ára samning í Noregi.
,,Ég var hérna í viku og náði að kynnast félaginu og borginni, ég kann vel við það sem ég hef séð. Þetta er góður hópur með góða leikmenn. Ég vonast eftir hjálp frá íslenskum liðsfélögum mínum til að aðlagast vel.“
,,Ég er spenntur fyrir því að fara út á völlinn og sanna ágæti mitt,“
Lars Bohinen, þjálfara Álasunds er spenntur fyrir því að vinna með bakverðinum. ,,Erik Hamren talar vel um Davíð,“ sagði Bohinen en Davíð lék sinn fyrsta landsleik á dögunum.
,,Davíð er sterkur, snöggur og er með öflugan vinstri fót. Davíð fann sig vel í hópnum okkar og ég er viss um að hann verður styrkur innan sem utan vallar.“
