Gunnlaugur Jónsson hefur samið um starfslok hjá Þrótti en það var að hans ósk. Er þetta annað árið í röð sem þjálfari liðsins hættir á undirbúningstímabilinu.
Ekki er ár síðan að Greg Ryder sagði starfi sínu lausu rétt fyrir mót. Þá tók Gunnlaugur við.
Af heimasíðu Þróttar:
Gunnlaugur Jónsson hefur látið af störfum sem aðalþjálfari meistaraflokks karla hjá Þrótti en gert hefur verið samkomulag um starfslok hans sem tekur gildi nú þegar. Gunnlaugur óskaði eftir starfslokum af persónulegum ástæðum og mikilla anna á öðrum vettvangi og var orðið við þeirri ósk og skilja leiðir í sátt allra aðila. Hann tók við liði Þróttar á erfiðum tímapunkti fyrir síðasta keppnistímabil og kom liðinu m.a. á mikið skrið í seinni umferð Inkasso-deildarinnar þar sem liðið tapaði ekki leik í átta umferðum, skoraði mikið af mörkum og lenti í 5.sæti deildarinnar eftir erfiða byrjun.
Gunnlaugi er þökkuð góð störf fyrir félagið og við Þróttarar óskum honum góðs gengis í komandi framtíð. Þórhallur Siggeirsson sem starfað hefur sem aðstoðarþjálfari meistaraflokks og yfirþjálfari afreksstarfs mun taka tímabundið við aðalþjálfun flokksins.