Graeme Souness, fyrrum leikmaður Liverpool, telur að enska landsliðið muni aldrei ná alvöru árangri með þá Dele Alli og Lingard á miðjunni.
Souness segir að það sé ómögulegt fyrir England að stjórna leikjum með tvo leikmenn inná sem er illa við að halda knettinum.
England náði góðum árangri á HM í sumar en féll úr leik á dögunum eftir 2-1 tap gegn Króatíu í undanúrslitum.
,,Þú vinnur ekki stóru bikarana, þú stjórnar ekki fótboltaleikjum og heldur boltanum nema þú sért með góða leikmenn á miðjunni sem geta haldið honum,“ sagði Souness.
,,Ég ræði þá aftur um Lingard og Dele Alli, tvo leikmenn sem vilja binda enda á sóknir og eru rétt staðsettir eftir sniðugt spil hjá öðrum leikmönnum.“
,,Þeir vilja ekki vera of mikið á boltanum og halda honum. Þeir vilja sjá um að binda endahnútinn á sóknir og skora mörk.“