Það fóru fram sex leikir í ensku úrvalsdeildinni í gær og þar á meðal stórleikur á Old Trafford.

Það var boðið upp á fínasta leik í Manchester en gestirnir í Arsenal komust tvisvar yfir. United svaraði þó í bæði skiptin í leik sem lauk með 2-2 jafntefli.

Paul Pogba miðjumaður Manchester United byrjaði leikinn á meðal varamanna en lék síðustu mínútur leiksins.

Samband hans við Jose Mourinho, stjóra liðsins er ekki gott. Pogba virðist ekki alltaf nenna að leggja sig fram og það þolir stjórinn ekki.

,,Það er ekki pláss fyrir þá sem leggja sig ekki að fullu fram,“ skrifaði Mourinho í skrá sem gefinn var út fyrir leik.

Túlka má orð hans þannig að þarna sé hann að skjóta á Pogba.