Mario Balotelli, leikmaður Nice í Frakklandi, er orðaður við lið AC Milan þessa stundina en hann hefur tvisvar áður leikið fyrir félagið.
Framherjinn hefur lítið gert fyrir Nice á tímabilinu og gæti verið á förum í byrjun næsta árs.
Stuðningsmenn Milan vilja þó ekki sjá Balotelli aftur og hafa látið hann vita af því á samskiptamiðlum.
,,Það er svo gaman að sjá marga stuðningsmenn Milan sem vilja ekki sjá mig snúa aftur til félagsins,“ sagði Balotelli.
,,Það er allt í lagi, einn daginn þá þurfa þeir á þér að halda og einn daginn ekki. Það er mikilvægt að sjá ekki eftir neinu.“
,,Ég er ekki að plana nein félagaskipti. Ég vil undirstrika hvernig það er ekkert þakklæti og engin virðing frá fólki sem ég mun alltaf elska.“
