Alex Oxlade-Chamberlain var seldur til Liverpool síðasta sumar en hann gekk í raðir félagsins frá Arsenal.
Miðjumaðurinn spilaði með Arsenal í sex ár en náði í raun aldrei að festa sig almennilega í sessi.
Blaðamaðurinn Alan Gernon greinir frá því í dag að Arsenal hafi passað sig á að nota Oxlade-Chamberlain sparsamlega er hann var hjá félaginu.
Ástæðan er klásúla sem var í samningi leikmannsins sem kom frá Southampton árið 2011.
Í hvert skipti sem Oxlade-Chamberlain lék yfir 20 mínútur í leik þá þurfti Arsenal að borga uppeldisfélagi hans tíu þúsund pund.
Gernon bendir á það að Oxlade-Chamberlain hafi oft komið við sögu í leikjum á 71. mínútu eða seinna.
Nú er spurning hvort það hafi haft stór áhrif á spilatíma leikmannsins á Emirates en hann lék þó oft meira en 20 mínútur ef þess þurfti.
Arsenal er þó ásakað um að reyna að passa sig að nota leikmanninn ekki að óþörfu í leikjum sem skiptu kannski minna máli.